Ei gunn Dach!

Senn ihr also aa do! Senn ihr aach komm weje dem Manfred? Es hädd mich aach gewonnerd wenn ihr ned komm wäre, ihr Freibiergesichder. Awwa halb so schlemm, ich bin desweje jo sogar exdra von Saabrigge dohergefahr.

Also verdient haddas jo, der Manfred. Wann a blos nedd so e komischa Vornahme han dähd. „Manfred?!“: Das bassd jo eijendlich nur for e Opel-Manta-Fahrer, der wo medda Frisös eromscharwenzelt. Awwa Opel es jo bankrodd onn unsa Manfred däd im Läwe(!) kä Opel fahre.

Weil: de Manfred ess jo absoluder BMW-Friehg; von so emme meddelgroße Schlidde. Die diggschd BMW-Sord hädda villeicht gäre, awwa das kann sich e Informadikprofessor heidsedachs jo nemmeh leischde.

Wann ihr äna Fähla mache wolle, dann misse ihr mem Manfred e Geschbräch iwwer Audos ahnfange. Dann hann ihr nämlich en der nägschd halb Stonn nix meh se lache. De Manfred werd eich dann vagliggere wie gudd sei Audo ess onn vor allem wie wenisch das verbrauche duhd. Neilisch ess er off das schmale Bredd komm onn had uns vazehld, er wär noh Niernbersch gefahr onn bei Erlange hädda Schbrit ablosse misse, sonschd wär de Tank (wo in Aachen halb lähr gewehn wär) nämlich weje Iwwerfillung geplazd.

Ich hann jo seit korzem aach so e alder (awwa zwei Nummere kläänera) BMW faschd geschengd kredd. Med der Abwrackprämie kennd ich jedzd noch e beachdliches Geschäfd mache. Awwa ich muss sahn, dass ich in punkto Verbrauch de Manfred ned beschdädische kann. Ich wird liewa sei abgelossener Schbrit bei mir erenfille, weil meiner sauft noch meh Benzin wie ich Bier gesoff han vor meim Zogga. Ach so: Proschd allerseits. Ich wolld extra Saarfirschd Biereiche medbringe – wo jeder kennd der wo emol en Dagstuhl war unn was ma sonschd nerjens off da Welt kriehn kann. Awwa die senn bangrodd weil de Manfred in Dagstuhl ned genuch devonn gedrung had. Desweje hann ich misse die nei Sord „Zischke“ als Ersatz medbringe, awwer das zischd jo vielleichd sogar besser.

E anneres Beischbiel for ebbes ned so Exagdes beim Manfred: Wanna sahd „Nur ein Halbsatz dazu“, dann kenne ihr ruhisch erausgehn onn e Tass Kaffee dringe. Vor acht Minudde nämlich ess der Halbsatz bestemmt net zu Enn.

Ei jo, er flunkerd hald als emol e bisje, unsa Manfred. Awwa er es doch e feina Kerl. Unn ihr werre eich noch schwer(!) wonnere wann der emol nemmeh jede Daach do ess.

Was had de Manfred ned alles for die Combjuderei in Aache gemachd! Wenn ich Eich das alles ferzehle dähd, dann missde ma e Nachdschicht enleje. Desweje muss ich mich „aus Zeidgrinde“ off ähn ähnzisches Hochlicht oder Highlight (wies fornähmer of Englisch heischd) beschränke, nämlich off sei SFB. Do esser jo besonnerschd schdolz droff. On zwar med Recht!

Also SFB! Das es e Abkerzung for „Sie forze bloo“. Wie: Duhn Ihr das ned verstehn? „Blooforze“ heischd soviel wie blaumache. Unn das hann viel Leit en dem SFB gemachd.

Wie had der eijendlisch noch geheischd, der SFB? Irjendwas med IMM. „Impuls“ oder „Im Puff“ (nä das war jetzd e bisje polidisch falsch oder inkorregd). Wie war jedz awwer nochemol der Name: „Im..“, „Im..“,...?

Jedzd hannichs: „Impruuv“ war de Name. Med zwei „u“ onn med Vogel-Fau.

Om was es do gang es, das wääs ich nemmeh so genau, jedefalls had ma stonne-, monade- onn johrelang iwwa Prozess-Produktmodelle geschwätzd. Ich hann dodefonn jo nedd soviel verschdann, awwer ich han mich emmer gewonnerd, dass zeerschd der Prozess komm es onn dann erschd das Produkt, wobei nadierlich nie e Produkt erauskomm ess. Soviel nur näwebei.

War jo aach klar: Bevor ma sich das ganze Drama (odda wie ma in Oche saahd: där janze Driss) meddeme konkrede Produkt ahnduhn duhd, ess es jo viel angenähmer, vorher offzeheere unn stattdesse e annerie Bauschdell offzemache. Dann kamma viel wenischer kritisiert werre, wenn das Produkt ned so fungdsjonierd als wie wo mas seerschd grosmeilisch verschbroch hat. So machd ma das enn da Informadik jo permanent.

Iwwerhaubd ess die Prozess-Produkterei e großa Kabbes onn had med da Realidäd wenisch se duhn. „Zuerschd der Prozess unn dann das Produgd“ had de Manfred emma gesahd. Aber in Werglichkeid es es doch genau omgekehrd: Zuerschd kommt es Produgd on dann meischdens de Prozess. Wie soll ich eich das vagliggere? Vielleichd so: Ahngenomm, ihr mache jemand e Kend, weil die Spezifigadzion odda meinetweje es Condominium ned perfegd gebassd hat. Dann es das Kend jo quasi das Produgd. Onn dann kriehn ihr nohher (awwa ned vorher!) de Prozess an de Hals, wann ihr kä Alimende zahle duhn. So ähnfach es das.

Im SFB han se so ähnfache Argumendadzjone awwa parduh ned verschdehn wolle – onn ich hann aach ned gemeggerd, weil ich mir hald gedengd han: „Oh geh fott, loss se doch mache, was se wolle. Bevor ich mir noch siebzeh annere Halbsätz anheere muss...!“.

En dem SFB ess es awwa aach om annere Sache gang, zum Beispiel om Polyamid-6. Das ess so e Zeich, das wo ma angeblich fier Damestrimp brauche kenne däd. Ich hann awwa nie Damestrimp em SFB gesiehn, ned emol bei da Frau Baier, die wo im SFB ganz schehn Karriere gemachd hat. Die hat nämlich emmer e Hoserock angehadd.

Unn dann hads aach Dinger gebb wie Ein-Schnecke-Extrudere odda Schemakorrespondenzeditore. De Extruder hamma kerperlich gesiehn. Das war so e handelsieblicher Fleischwolf, blos viel viel deirer; irjendwo muschde jo die SFB-Middel schließlich hin. De Schemakorrespondenz-editor unn anere Ungetieme konnd ma leider nedd siehn. Zum Glick nedd!

Ich menn jo nur: De Editor hädd ma siehn kenne, vielleichd aach de Korrespondenzeditor (das wär dann beispielsweis de Peter Scholl-Latour). Awwa beim Schemakorrespondenzeditor had dann die Phantasie nemmeh medgemacht. Ess vielleichd aach besser so.

Unn viele annere Sache hamma aach nie gesiehn wie zum Beispiel:
„integratorrahmenwerksbasierte Korrepondenzanalyseregele“ odda
„metamodellerweiterte Softwareentwicklungsumgebungen“.

Om nur emol zwei se nenne.

Die meischde konkrete Sache wie der Fleischwolf, die senn jo vom Maschbau komm. Odda von der Verfahrenstechnik. Nomen est omen, wie der Ladeiner sahd: Der Karre war verfahr, nur die DFG hads hald ned gemergd.

De Manfred had als Schbrecher schdradegisch gewirgd onn vor allem unendlich fiel Bildscher gemohld. Lauder Rechtecke onn Ovale, onn dodezwische nix wie Pfeile hin unn her. Ich wäs jo ned, ob ihr Eich das vorstelle kenne, wie so ebbes ausgesiehn had.

Awwa fielleichd war jo der ähne oder annere von eich schon emol in Brüssel oder genauer gesahd in Waterloo, wo de Napoleon domols schwer äna off die Wutz kredd had. In Waterloo senn so Tafele med Laacheplän offgeschdellt, wo die ganze Regimenta vom Blücher, vom Wellington onn vom Napoleon engetraa senn – inklusive Kavallerie, Artillerie onn so. Onn nadierlich zusamme med jeda Menge Pfeile, die wo die Bewehschunge von dene ähnselne Abdeilunge dargeschdellt han.

So ähnlich hann em Manfred sei Bildscha aach ausgesiehn onn wenn ma ne noch e bissje gewähre gelossd hädd, dann hädd de Napoleon in Waterloo vielleichd noch gewonn onn Aachen würd dann widda Aix-la-Chapelle heische onn wär goddseidank noch bei Frankreich em Département Roer so wie schon Siebzehhunnerdachteneinzig. Onn mir em Saarland wäre em Département Sarre odder als Pälzer em Département Mont-Tonnerre (also Donnersbersch). Es ess werklich zu schad, dass de Manfred ned domols schon sei Bildscher mole konnd. Die Weldgeschichd wär annerschda verlaaf.

Was mir von Informadig vier em SFB gemachd han (ich war jo domols noch bei Eich onn bin schbäda widda in mei ald Heimad no Saabrigge gezoh), das wääs ich gar nemmeh. Ich kann mich bloß noch erinnere, dass mir bei da Begehung dorch Schduhlklunscherei de Schdrom-schdecker erausgezoh hann onn die miehsam sesamme¬geknoddelde Demonschdration beinägschd zum Abschdurz gebrung hann. Das war awwa aach e totahl beknaggdie Demo: „Gunn Dach, Herr Trennexperte, ich bin die Reaktionsexpertin. Was meint denn der Fließbildexperte?“ Unn so weida onn so fort. Jeder verninftische Mensch had soford gesiehn, dass e Firma, die wo so beschdussde Midarbeider hat, im Nullkommanix bangrodd gehn muss. Vielleichd senn die Firme aach desweje kabudd gang, weil se die Sache vom SFB irrtiemlich engesetzd han onn der SFB es jetzd aach noch schold an der Wirdschaftskrise.

Awwa das wär jädzd dann doch zuviel schbegulierd unn zuviel von dem Gudde (Lioner, der wo ich aach medbrung hann).

Proschd, Manfred - onn nix for ungudd.

Aachen, 26. Juni 2009 Otto Spaniol